Арассыыйаҕа — «Норуоттар култуураларын нэһилиэстибэтин», үөрэхтээһин эйгэтигэр — «Ааҕыы сыла» биллэриллибитинэн уонна Ийэ тыл, сурук-бичик күнүгэр аналлаах «Үрдүккэ көтүт, төрөөбүт төрүт тылым» Өнөр оскуолатын иһинээҕэ декада чэрчитинэн нэһилиэк тэрилтэлэрин иһинэн ыытыллар “Тыл оонньуута” тэрээһин ыытылынна. Бырайыак ааптарынан оскуолабыт саха тылын уонна литературатын учуутала Громова Альбина Николаевна.
“Тыл оонньуута” тэрээһин нэһилиэк тэрилтэлэрин иһинэн хаһыс да сылын бэрт тэрээһиннээхтик, көхтөөхтүк ыытыллар. Быйылгы оонньуу zoom платформа нөҥүө ыытылынна. Олохтоох дьаһалта, ветеран сэбиэтин, оҕо уһуйаанын, кулууп ветернарнай участок, дьиэ-уот коммунальнай хаһаайыстыба, оскуола хаһаайыстыбатын көмө үлэһиттэрэ 5тии киһи састааптан турар хамаанда тэрийэннэр тылга, литератураҕа, төрүт култуураҕа сыһыаннаах түһүлгэлэргэ оонньоотулар. Оонньуу түмүгүнэн; 3 миэстэ- кулууп үлэһиттэрин хамааандата, 2 миэстэ – оҕо уһуйаанын үлэһиттэрин хамаандата, 1 миэстэ уонна көһө сылдьар кубок хаһаайыттарынан олохтоох администрация үлэһиттэрин коллектива буолла. Миэстэлэспит хамаандалар мэтээллэринэн, кыттыбыт хамаандалар сэмэй бэлэҕинэн наҕараадалыннылар.
Бырайыак ааптарыгар Альбина Николаевнаҕа, Төрөөбүт тыл сүмэтин, эриэккэһин, кэрэтин, киэҥ, дириҥ өйдөбүллээҕин, Ийэ тылынан киэҥ туттуу, өрө тутуу, туттуллар эйгэтин кэҥэтэргэ туруулаһан, үлэлэһэрин иһин дириҥ махталбытын тиэрдэбит. Үлэҕэр өссө да үрдүк сиьиһиилэри, чөл буолууну баҕарабыт.
Бары хамаандаларга кыттыыгыт иһин махтанабыт, өрүү даҕаны көхтөөх, доруобай буолуҥ, төрөөбүт Ийэ тылгытын харыстааҥ