Улууспут киинигэр Бороҕоҥҥо кэтэһиилээх 3800м2 иэннээх таас Василий Васильевич Никифоров-Күлүмнүүр аатынан култуура дыбарыаһын аһыллыытын үөрүүлээх чааһа буолла. Тэрээһиҥҥэ СӨ Ил Дархана Айсен Николаев, СӨ Бырабыыталыстыбатын Бэрэссэдээтэлин солбуйааччы Сергей Местников, СӨ Судаарыстыбаннай Мунньаҕын (Ил Түмэн) Бэрэссэдээтэлин бастакы солбуйааччы Александр Жирков кытыннылар.
Василий Никифоров – Күлүмнүүр аатынан култуура Дыбарыаһын аһыллар үөрүүлээх тэрээһинигэр тумус туттар биир дойдулаахпыт, Саха Өрөспүүбүлүкэтин Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы Александр Жирков “Маннык дьону-сэргэни түмэр култуура улахан Дыбарыаһа улууспутугар тутуллан олоххо киирбитэ – бу барыбыт түмсүүлээх үлэтэ, инники ыччаппыт сайдыытыгар улахан тирэҕэ” диэн бэлиэтээн эттэ.
Үөрүүлээх аһыллыыга улууспут талба талааннарын, култуура Дыбарыаһын кэлэктиибин күүһүнэн эҕэрдэ кэнсиэр тэрилиннэ, уопсастыбаннас, нэһилиэк баһылыктара, тэрилтэ салайааччылара кыттыыны ыллылар.