Олунньу 24 күнүгэр, Аҕа дойдуну көмүскээччилэр күннэринэн эҕэрдэлээн туран «Дьүөгэ» вокальнай ансаамбыл тэриллибитэ 10 сылын бэлиэтиир бырааһынньыктааҕы концерт буолан ааста.
«Дьүөгэ» вокальнай ансаамбыл 2014 сыллаах саҥа дьылы көрсө ыытыллар бырааһынньыктааҕы концертка аан бастаан сүрэхтэнэн сыанаҕа тахсыбыттара. Ол кэмтэн ыла, ансаамбыл буолан тэриллэн элбэх ырыа күрэхтэригэр ситиһиилээхтик кыттан, элбэх уус-уран самодеятельность концертарыгар ыллаан кэллилэр.
Бу ыытыллыбыт, ансаамбыл концера 3 — с концертара буолла. Концертка кыргыттар ох курдук оҥостон, ылбаҕай ырыаларынан эрэ буолбакка, көрдөөх сценкалар, үҥкүүлэр бэлэмнэнэн концеры киэргэттилэр. Ону таһынан, кыргыттар бэйэлэрин оҕолорун кытта араас нүөмэрдэргэ бэйэлэрин талааннарын көрдөрдүлэр. Екатерина Атласова кыыһа Алисалыын синтезаторга оонньоон, Светлана Протопопова кыыһа Саяналыын дуэттаан, Екатерина Ушницкая оҕолоро Петя, Айсаана буолан истиҥ ырыаны толороннор көрөөччү биһирэбилин ыллылар.
Эҕэрдэ концерт түмүктүүр чааһыгар, истиҥ эҕэрдэлэринэн түмүктэннэ. Ол курдук ансаамбыл кыргыттарыгар аймахтара, коллегалара, тэрилтэлэр, түмсүүлэр сэмэй бэлэхтэрин уонна эҕэрдэ суруктарын туттартаатылар. Нэһилиэк бочуотунай грамоталарын уонна эҕэрдэ тылын, олохтоох дьаһалта уонна нэһилиэк депутаттарын аатыттан туттарда Мария Пантелеймоновна Лукачевская. Бочуотунай грамотанан наҕараадаланнылар: Василиса Ушницкая, Екатерина Атласова, Джулия Афанасьева, Светлана Протопопова, Мария Лукачевская.
Концеры иилээн ыыттылар: Захар Борисов уонна «Дьүөгэ» ансаамбыл бастакы састаабын чилиэнэ Раиса Сыроватская.
Махтанабыт, бу киэһэ кэлэн биһигини кытта бииргэ буолбут күндү көрөөччүлэрбитигэр. Сылаас ытыскыт тыаһын бэлэхтээн, биһигини кынаттаабыккытыгар.