Муус устар 7 күнүгэр, Туймаада хочото килбэйэр киинигэр, дьоллоох Дьокуускай куоракка Өксөкүлээх Өлөксөй аатынан норуоттар доҕордоһууларын дьиэтигэр «Ыллам ырыа кэһиилээх» кэнсиэр буолан ааста.
Кэнсиэр сүрүн сыала, эһиил 2024 сылга билигин үлэлии турар Өнөрдөөҕү «Тускул» сынньалаҥ киин дьиэтэ үлэҕэ киирбитэ 50 сылын бэлиэтиир тэрээһинигэр ананан ыытылынна. Ырыа дьоро түһүлгэтигэр кыттыыны ыллылар: «Иэйии», «Дьүөгэ», «Тоҕуй» ансаамбыллар, «Күбэйэ» квартет, «Далбарай» үҥкүү бөлөҕө, Анна Макарова, Ион Лукачевскай, Александр Лукачевскай, Николай Лыткин, Мария Лукачевская, Октябрина Протопопова, Василий Федоров, Владислав Лукачевскай, Джулия Афанасьева уонна биир дойдулаахтарбыт Дьокуускай куораттан Зинаида, Влад Лукачевскайдар, Сахаяна Герасимова, Владимир Ушницкай, Жанна Чернордская ылбаҕай ырыаларын бэлэх ууннулар. Ону тэҥэ «Алаас кыргыттара» үҥкүү бөлөҕө ыалдьыттаан үҥкүүнэн киэргэттилэр.
Кэнсиэри иилээн-саҕалаан ыытта Иван Тарасов.
Күндү нэһилиэкпит уус-уран самодеятельноһын бары кыттыылаахтарыгар махтал тылларбытын аныыбыт. Куруутун бу курдук өйөбүл буоларгытынан киэн туттабыт. Өссө да үүнэ-сайда, чэчирии үүнэ туруоххайын. Айар-туойар кут эһиэхэ өрүү арахсыспат аргыс эрэ буола сырыттын.
