Өнөр нэһилиэгэр ахсынньы 9 күнүгэр Россия Дьоруойа Михаил Михайлович Стрекаловскай аатын сүгэр Өнөр орто оскуолатын 100 сылын бэлиэтиир дьоро күнэ «Дьоруойдар күннэригэр» түбэһиннэрэн ыытылынна. Үбүлүөй тэрээһиннэрэ Кыайыы болуоссатыгар Өйдөбүнньүк миитинтэн саҕаланна.
Үбүлүөйдээх күн биир бэлиэ түгэнинэн «Үөрэммит кыһабыт үйэлээх кэрдииһэ» диэн кинигэр сүрэхтэниитэ буолла.
Тэрээһин үөрүүлээх чааһыгар араас кэмҥэ үөрэммит үөрэнээччилэр, үлэлээбит учууталлар бэйэлэрин эҕэрдэлэрин эттилэр, оскуола үөрэнээччилэрэ ырыаларын-үҥкүүлэрин, ыраахтан-чугастан кэлбит бар дьоммутугар бэлэхтээтилэр. Улуус баһылыга Алексей Федотов эҕэрдэ тылыгар Өнөргө саҥа оскуола-саад тутуута бигэргэнэн 2025 сылга үлэҕэ киириэхтээҕин туһунан иһитиннэрэн нэһилиэк олохтоохторун сүргэлэрин көтөхтө.
Бу күн математика учуутала Валентина Протопопова «РФ үөрэхтээһин уонна иитии бочуоттаах үлэһитэ» бэлиэнэн, алын сүһүөх кылаас учуутала Акулина Лукачевская «СӨ учууталлар Учууталлара» бочуоттаах бэлиэнэн, ОБЖ учуутала Юрий Протопопов СӨ Бырабыыталыстыбатын Бэрэссэдээтэлин махталынан наҕараадаланнылар.
