Сэтинньи 28 күнүгэр Өнөр нэһилиэгэр олус долгутуулаах, үөрүүлээх күн тосхойон нэһилиэк дьоно мустан, Өнөр киэн туттар, элбэх оҕолоох ыала Черноградскайдар дьиэ-кэргэн ийэлэрэ Наталия Николевна, Саха Республикатын “Герой ийэ» үрдүк бэлиэнэн наҕараадаламмытын чиэстиир үөрүүлээх чааһа буолан ааста.
Наталия Николаевна 1988 сыллаахха Серго Орджоникидзе аатынан Дьокуускайдааҕы медицинскэй училищеҕа сиэстирэ идэтин ылан үөрэнэн бүтэрэн, Өнөр участковай балыаһатыгар палатнай сиэстирэнэн ананан үлэлии кэлэр.
1989 сыллаахха олоҕун аргыһын Марьян Петрович Черноградскайы көрсөн алаһа дьиэни тэринэн, олохторун холбоон ыал буолбуттара. Наталия, Марьян тапталларын туоһулара буолар: 4 уол, 6 кыыс оҕону төрөтөн, күн сирин кэрэтин бэлэхтээн, 4 сиэн тапталлаах эбээтэ, эһээтэ буолан мааны ыал бастыҥа дэтэллэр. Хас биирдии оҕо бары олус талааннаах, үөрэх бастыҥнара, спортсменнара, активистара буолаллар. Черноградскайдар дьиэ кэргэн ситиһиилэрин туоһулуур быыстапка уонна Өнөр нэһилиэгин Герой Ийэлэрин быыстапкалара кулууп сынньанар саалатын киэргэттилэр.