Владислав
Лукачевскай
Лукачевскай Владислав Михайлович 1966 сыллаахха балаҕан ыйын 16 күнүгэр Өнөр нэһилиэгэр элбэх оҕолоох Дария, Михаил Лукачевскайдар дьиэ кэргэҥҥэ алтыс уол оҕонон күн сирин көрбүтэ. Төрөппүттэрэ Дария Гаврильевна, Михаил Михайлович 7 ини-бии уолаттары уонна биир мааны кыыс оҕону төрөтөн, иитэн- үөрэтэн, оҕолорун кыра эрдэхтэриттэн үлэҕэ сыһыаран улаатыннарбыттара. Бииргэ төрөөбүт Лукачевскайдар ырыаны олох аргыһа оҥостон, үлэни өрө тутан төрөөбүт дойдуларыгар Өнөр нэһилиэгэр халыҥ аймах буолан, тэнийэн –ууһаан удьуордаан олороллор. Лукаческайдар дьиэ кэргэн улууска, республикага ырыа куттаах дьиэ кэргэнинэн биллэллэр. 2019 с. Дьокуускай куоракка Өксөкүлээх Өлөксөй аатынан норуоттар доҕордоһууларын дьиэтигэр көмө кэнсиэр оҥорон, толору саал мунньан, киирбит үбү төрөөбүт нэһилиэктэригэр ыһыахтыыр сиргэ сыана тутуллуутугар бэлэх ууммуттара.
Владислав кыра эрдэҕиттэн ырыаны, музыканы дууһатынан таптаан улааппыта. 1986с. ырыа суруйан саҕалаабыта, бэйэтин тылыгар ”Уостубат таптал” диэн бастакы ырыатын сүрэхтээбитэ. Ол кэннэ, Николай Егоров тылыгар «Куоргэй», С.Капитонов тыл. «Тапталбыт чараҥар», бэйэтин тылыгар «Саҥа дьыл», «Ол сэрии», «Хотугу сулусчаан» диэн ырыалары суруйан дьонугар -сэргэтигэр бэлэхтээбитэ. Эдэр сааһыттан араас күрэхтэргэ, фестивалларга кыттар, нэһилиэк культууратын сайдыытыгар бэйэтин кылаатын киллэрбитэ. 2006с. улуустааҕы мелодистар күрэхтэрин кыайыылаҕа.
Владислав Онор аҕыс кылаастаах оскуолатыгар 1973 сыллаахха үөрэнэ киирбитэ, салгыы Дүпсүн орто оскуолатын бутэрбитэ . 1983 с. оскуоланы бүтэрэн, ыҥырыынан “Дүпсүн” совхоз отделениятыгар ыанньыксытынан ананан үлэлии киирбитэ. Онтон Дьокуускай 1 ньүөмэрдээх СПТУ-тугар сварщик идэтин ылбыта. 1993 сыллаахха бииргэ төрөөбүт убайдара, быраата буолан төрөөбүт нэһилиэктэригэр “Дьуона” бааһынай хаһаайыстыба тэринэн өр сылларга тыа хаһаайытыбатын сайдыытыгар үлэлээбиттэрэ. Билигин Өнөр орто оскуолатыгар охраннигынан үлэлиир.
1990 сыллаахха олоҕун аргыһын Надежда Николаевна Федорованы көрсөн ыал буолан 2 кыыс, 1 уол оҕолоохтор, эһээ, эбээ дьолун билэн 5 сиэннээхтэр.
Дьиэ кэргэн аҕа баһылыга Владислав оҕолорун кыра эрдэхтэриттэн ырыа кэрэ эйгэтигэр сыһыаран, уһуйан улаатыннарбыта, араас күрэхтэргэ кытыннарара. Ол курдук, “Хотугу сулус” республикатааҕы күрэххэ 2003 с. “Лучший мелодист”, 2004с “Лучший руководитель” анал ааттары ылбыта. Оҕолоро араас таһымнаах ырыа күрэхтэрин кыайыылаахтара, лауреаттара.
2021 үбүлүөйдээх 55 сааһын бэлиэтээбитэ. «За вклад в развитие культуры Усть-Алданского улуса» знагынан наҕараадламмыта.
Ырыалара:
"Уостубат таптал" Владислав Лукачевскай тыл. мел.
Өнөр күөлүм тула,
Үрүҥ күн налыйда,
Ыччат күлэр үөрэр
Кэрэ кэмэ этэ.
Ол кэмҥэ уҥуор онно
Биир уолчаан олорор
Аттыгар тостубут
Хатыҥчаан барыарар
х/ы
Уостубат таптал Өнөрүм долгуна
Оо, төннөрүүй миэхэ
Маҥнайгы тапталы,
Ааспыт кэрэ кэми...
Түүҥҥү сиик бүрүйдэ
Хатыҥы уолчааны,
Сэбирдэх аайыттан
Түһэр харах уута
Бу хатыҥ олоҕун
Инники дьылҕатын
Өнөр эбэм эн эрэ
Соҕотох билэгин
«Ол сэрии» Владислав Лукачевскай тыл. мел.
Мин билэбин киһи бу сиргэ Букатынныы кэлбэтэҕин, Ол эрээри олуһун эрдэ Киирэн хаалла кини күнэ. х/ы Биирдэ буолар олохпутун Огдолутта ол сэрии, Икки сүрэх ымыыларын, Үүнэн эрэр кынаттарын Сарбыйбыта ол сэрии Мин билэбин ийэ дойду иһин Кырдьык кыайбыт кыргыһыы, Ол эрээри өйдөммөт миэхэ Бу билиҥҥи олох сэриитэ.
Мин билэбин киһи бу сиргэ Буойун буолан кэлбэтэҕин, Ол эрээри олох ытык иэһэ Төлөбүрэ ыараханын.
"Күөрэгэй" Николай Егоров тыл., Владислав Лукачевскай мел.
Сарсыардааҥҥы чаҕыл халлаан,
Лыҥкынас чуораан кэриэтэ
Санаабар ордук аһылллан
Үөһээ дьири-дьир дьиэрэйдэ
х/ы
Ити күөрэгэй чыычааҕым,
Ытыһым иһиттэн көттө,
Күөҕүнэн тыынар айылҕа
Алаас сүргэтин көтөхтө
Сэргии оту-маһы ааҕа,
Аа-дьуо хонуунан иһэбин,
Сүрэҕим күөрэгэй саҕа
Мин эмиэ күнтэн үөрэбин
Баҕардым субу түгэҥҥэ
Муҥ саатар күөх от буолуохпун
Сибэккигэ, ыйга күҥҥэ
Сылаас санаабын саҕыахпын
"Хотугу сулусчаан" В.Лукачевскай тыл., мел.
Олус да кэрэҕин эн миэхэ,
Олус да дьиктилээх иэйиигин,
Эйигин көрөөрү мин кэллим
Сулуспут суһумнуур күнүгэр
х/ы
Эн, эн, эн, эн ыйчаан буоллаххына
Мин, мин, мин сулусчаан буоллахпына
Оччоҕо остуоруйа буолуоҕа
Эн, эн, эн биһи олохпут
Хотугу сулусчаан буолаҥҥын
Хорсуннук эйээрэр эбиккин,
Эйэлээх олоҕу туойаҥҥын
Эн элбэх доҕордоох эбиккин.
Эдэркээн сүрэхпит төлөнө
Хотугу сулуспут суһума,
Олохпут инники кэскилэ
Оҕо саас тапталлаах биһигэ.
"Саҥа дьыл" В.Лукачевскай тыл., мел.
Саҥаттан саҥа дьылбыт үүннэҕэ,
Ол аайы эйигин саныыбын күндүтүк,
Кыырпах хаар иэдэспэр
Түһэҥҥин ууллааҕын,
Эйигин уураата диэн
Долгуйар сүрэҕим.
х/ы
Саҥа саҥа саҥа саҥа дьыл
Ааспыт олох умнуллубат,
Сүрэхпэр хатаммыт тапталбын
Соппоппун мин эргэ дьыллартан.
Бу тыйыс тымныы
Дьыбардаах киэһэлэр,
Эйиэхэ тапталбын
Сойута сатыыллар.
Ааспыт аастаҕа
Симбиир эргиллибэттии,
Саҥа дьыл эрэ эйигин
Санатар билигин.
Дьоллоох түгэн кэрэ кэмин Олох умна сатаан, Хаһыс дьылым буолла Олорбутум буолуой? Сулус сүүрэр кэмин Өр кэтэһэн турдум, Санаам туолуо диэммин Кэлэр саҥа дьылга.