«Иэйии» вокальнай ансаамбыл толоруутугар «Кэриэстээн»

Кэриэстээҥ
                                              Петр Максимов тыла, Василий Федоров мелодията
Халлааҥҥа күөрэгэй ыллыыра 
Күөх дуолга оһуокай оонньуура. 
Ып ыраас халлааҥҥа сатарар 
Этиҥнии сэрии диэн ыар сурах 

Атаарыы ыар санаа баттыгар 
Ийэлэр ытаһа хаалаллар. 
Сайыһа хаалаллар алаастар, алардар 
Үүнүүлээх буолактар, саалаахтан самнымаҥ боотурдар. 

Кэлэллэр ыар нүһэр сурахтар 
Санааны күүһүрдэр суруктар, 
Өлүүнү утары тураммыт, 
Өстөөҕү имири эһиэхпит. 

Үлэлээҥ дойдугут туһугар 
Үйэлээх көҥүл дьол туһугар. 
Эрэниҥ эрдийиҥ, хорсуннук үлэлээҥ, 
Өстөөҕү өһөрөн, кыайыылаах эргиллэн кэлиэхпит. 

Түөрт уон биэс ыам ыйын тохсуһа, 
Өстөөхпүт өһөҕөр чачайда, 
Эргиллэн кэллилэр боотурдар, 
Эйэлээх үлэҕэ турдулар. 

Халлааҥҥа күөрэгэй ыллаата 
Күөх дуолга оһуокай дуорайда. 
Кэриэстээҥ, кэриэстээҥ сэриигэ охтубут, 
Хааннара тохтубут боотурдар албаннаах ааттарын.

«Иэйии» вокальнай ансаамбыл толоруутугар «Кыталыктар кырдаллара» Леонид Попов тыллара, Захар Винокуров мелодията

Кыталыктар кырдаллара



Үгүс үөмэх үөл үөттэр
Үмүрүччү үүммүттэр,
Кыталыктар кырдаллара
Бу киэн Лена кытыллара

Улуу өрүс хочотугар
Куба түһэр хочотугар
Ыйырбахтаан ылар курдук
Эҕирийэ тыына турдум

Кэрэкэтиэн Ийэ дойдум
Сахам сирин сааскы күөҕэ
Кэҕэ эттин, чыычаах туойдун
Сүрэх тэптин күүскэ үлэҕэ

«Иэйии» вокальнай ансаамбыл толорууутугар «Иитиллибит алааһым» Н.Литвинцев тыла, В.Ушницкай мелодията

Иитиллибит алааһым

Николай Литвинцев тыла,
Владимир Ушницкай мелодията

Киһи төрөөн аан бастаан
Кэһиэхтээхтик ытаабыт
Эмиий үүтүн ыймахтаан
Эмсэхтэнэ аһаабыт

Эмньик сааһым уйата
Эһэлээҕим сыһыыта

Тэбэнэттээх эрдэххэ
Тилэхтэрбин чэрдээбит
Аөҥүл чыычаах кэриэтэ
Көтөн-дайан үөскээбит

Эдэр сааһым киэҥ дьиэтэ
Эһэлээҕим эйгэтэ

Оо, ханна да буолларбын
Кэлэ туруом алааспар
Сэргэхсийэ хаамабын
Сибэккилээх сыһыыбар

Иитиллибит алааһым 
Илгэ, тыына сылааһын

Күнэ үрдүк, күөҕэ өҥ
Салгына да ураты
Дойдубуттан Өнөртөн
Ордук сири булбатым

Өнөр буора - мин дойдум
Өнөр сирэ - мин дьолум

«Иэйии» вокальнай ансаамбыл толоруутугар «Өнөр сирин таптыыбын»

Өнөр сирин таптыыбын
                                    Петр Максимов тыл., мелодията
Тыгын Дархан ытыктаан
Үтүө аатын ааттаабыт
Тоҕуй ууһун саҕаттан 
Тоҕуоруспут бар дьоммут
Күлүмүрдэс долгуннаах
Сырдык ыраас уутугар
Сордоҥ, мунду, алыһар 
Собо бэрдэ балыктаах

Өҥ быйаҥнаах дойдубун 
Өнөр сирин таптыыбын!

Уолан бүппэт уулардаах
Бастар бүппэт балыктаах
Дьигискэннээх сүүрүктээх
Дьикти кэрэ үрэхтээх
Үрэхтэрин баһыгар
Сир аһынан дэлэйбит
Хара тыатын быыһыгар
Араас кыыла үөскээбит.

«Иэйии» вокальнай ансаамбыл толоруутугар «Дьол-соргу туһугар» Уйбаан Туймалыырап тыллара, Станислав Луковцев мелодията

Дьол- соргу туһугар

Алданы төрдүнэн, Өлүөнэм сүнньүнэн,
Алаастаах, үрэхтээх тайҕанан тэнийэн,
Үтүөнү, кэрэни үксэтэр үлэнэн,
Үүнэбит, сайдабыт үйэттэн үйэҕэ.

Бороҕон, Бэрт Хара буулаҕа удьуора
Дьол-соргу туһугар дьулуйан турунар.

Уостубат уйгулаах ураты дойдуну,
Урааҥхай ууһаабыт Уус - Алдан улууһун
Кэтит - киэҥ киэлитин кэрэхсии таптыыбын, 
Кэрэни айаммын киниэхэ аныыбын.

Улуукан алааска улахан ыһыахха 
Олоҥхо дуорайар, оһуокай ньиргийэр,
Эдэр саас эйэтэ, кырдьаҕас алгыһа
Эрчими эбэллэр, инники күүрдэллэр.

«Иэйии» вокальнай ансаамбыл толоруутугар «Алааһым барахсан» И.Федосеев тыла, В.Федоров м.

Алааһым барахсан

Алааһым барахсан
Алааһым салгына,
Аралы кустуга,
Дьэдьэнин амтана
Дьэргэлгэн ыллыга

Олус да күндүгүн 
Оо, бэйэм сөҕөбүн,
Алааһым алааһым барахсан!


Алааһым тулата
Айгыр күөх барыта
Сибэкки сиксиэрэ
Сэмэй тыал сиккиэрэ

Кэрэ да эбиккин,
Эн миэхэ биһиккин, 
Алааһым, алааһым барахсан!


Ол күөлгэ долгуннар
Оһуокай тэбэллэр,
Кырылыы устаннар
Кытыыга сүтэллэр.

Арылхай, чаҕылхай,
Алааһым барахсан, 
Алааһым, алааһым барахсан!