2024 сыл Ахсынньы 14 күнүгэр Өнөрдөөҕү “Тускул” сынньалаҥ киин дьиэтэ үлэҕэ киирбитэ 50 сылын бэлиэтиир, үбүлүөйдээх дьоро күнэ буолан ааста. Нэһилиэк култууратын дьиэтин үөрүүлээх тэрэһинигэр былааннаммытын курдук, күнүс 2 чаастан фойеҕа «Культура эйгэлээх үтүө дьоммут» быыстапкаттан саҕаланна. Онуоха диэри ыалдьыттары көрсүү, бэлиэтэнии буолла. Хас биирдии кэлбит ыҥырыылаах ыалдьыттарга, Юрий Протопопов эскиһынан оҥоһуллубут үбүлүөйнэй значоктары, ону тэҥэ кулууп туһунан брошууралар бэрилиннилэр. Быыстапкаҕа култуура эйгэтигэр араас сылларга үлэлээбит уонна нэһилиэк уус-уран самодеятельнай кыттыылаахтарын информационнай планшеттара, кулууп ситиһиилэрэ, историята сырдатыллан турдулар. Быыстапканы хомуйан, тэрийэн оҥорбут, олохтоох библиотека сэбиэдиссэйэ Светлана Черноградская, кэлбит ыалдьыттарга кэпсээн сырдатта. Быыстапкаҕа анаан, кулууп дьиэтин макета оҥотторуллубута. Бу макеты илиитигэр дьоҕурдаах, талааннаах нэһилиэкпит олохтооҕо Иван Протопопов кэргэнэ Светланалыын бэрт кылгас бириэмэ иһигэр оҥорон, быыстапкаҕа туран, кэлбит дьон сэҥээриилэрин ылыан ылла. Ону тэҥэ, урукку кэминээҕи хаартыскалары көрдөрөргө аналлаах, фотопленка моһуоннаах стендэни, уус талааннаах, биир бастыҥ общестенникпыт Юрий Протоповов оҥорон быыстапканы ситэрэн биэрдэ. Уонна ыалдьыттар хаартыскаҕа түһэллэригэр аналлаах аныгылыы, ретро темалаах фотозоналар, “Тускулаана” иистэнньэҥнэр түмсүүүлэлэрин үлэлэрэ турдулар.
Салҕыы тэрээһин хаамыытынан, сценаҕа сабыс саҥа “Ааҕар балаҕантан силис тардан” диэн буруолуу сылдьар кулууп туһунан кинигэ презентацията ыытылынна. Кинигэ автордарынан, өр сылларга кулууп дьиэтигэр директордарынан үлэлээбит, убаастыыр дьоммут Литвинцев Николай Николаевич II, Атласов Петр Николаевич буолаллар. Тапталлаах кулууппут дьиэтэ үлэҕэ киирбитэ үбүлүөйдээх күнүн көрсө, кулууппут историятын тиһэн, сүдү улахан үлэни дьонноругар-сэргэлэригэр бэлэх оҥорон таһаардылар. Кинигэ презентациятын автордар иккиэн бэйэлэрэ ыыттылар. Түмүгэр олохтоох дьаһалтаҕа, библиотекаҕа, музейга, оскуолаҕа, кулуупка сабыс саҥа кинигэлэри туттартаатылар. Уонна араас сылларга үлэлээн ааспыт культура үлэһиттэригэр.
Программа хаамыытынан, үһүс чааһынан “Сырдыгынан сыдьаайан” торжественнай чааһа. Саҕаланыытыгар үйэ аҥардаах бырааһынньык бэлиэтин, символическай күлүүһү туттарыы үөрүүлээх чааһыттан саҕаланна. Символическай күлүүһү 50 сыл анараа өттүгэр кулууп директорынан үлэлээбит, саҥа кулууп дьиэтин күлүүһүн туппут – Ширяева (Васильева) Фаина Николаевна, уус-уран салайааччынан үлэлээбит — Ушницкая (Винокурова) Александра Григорьевна билигин үлэлии олорор кулууп коллективыгар туттардылар. Уонна тэрээһин саҕаламмытынан, үлэлээбит сылларын ахтан-санаан бар дьонноругар сырдаттылар. Ол кэнниттэн, тэрээһин маанылаах ыалдьытынан буолла, Саха Өрөспүүбүлүкэтин норуодунай артыыһа, Саха АССР культуратын үтүөлээх үлэһитэ, Саха сирин искусствотын үтүөлээх деятеля, 4 улуус бочуоттаах олохтооҕо, мелодист Аркадий Михайлович Алексеев. Аркадий Михайлович үйэ аҥара анараа өттүгэр, кулууп арыллыытыгар кэлэн эҕэрдэлээн, кэнсиэргэ кыттыыны ылан ааспытын сырдатан туран икки ырыаны ыллаан бэлэх уунна.
Онтон салҕыы, эҕэрдэ тыллары эттилэр, улуус культуратын управлениятын начальнига — Сергей Сергеевич Нафанаилов, нэһилиэк аҕа баһылыга — Лукачевскай Николай Николаевич, улуус культура управлениятын информационно-методическэй киин сэбиэдиссэйэ – Бережнева Марианна Васильевна, биир дойдулаахпыт — Куличкин Вячеслав Семенович, Оллонов Геннадий Николаевич, араас сылларга үлэлээн ааспыт култуура эйгэтин үлэһиттэрэ, нэһилиэктэр култуураларын дьиэтин директордара, нэһилиэк тэрилтэлэрэ, түмсүүлэрэ, активистара, биир дойдулаахтарбыт. Эҕэрдэ тыл бастыҥын анааччылар, бары кэрэни, ситиһиилэри, саҥаттаан саҥа саҕахтары дабайан иһин диэн алгыс тылларын эттилэр уонна култуура дьиэтэ материально – техническай базата хаҥыырыгар харчынан, сыаналаах бэлэхтэри, ону тэҥэ туһааннаах маҕаһыыннартан сертификаттары туттардылар. Тэрээһини ыыттылар Александра Румянцева, Ксения Лукачевская.
Тожественнай тэрээһин кэнсиэрин киэргэттилэр, нэһилиэк уус-уран самодеятельной активын, түмсүүлэрин кыттааччылара.
Үбүлүөйдээх тэрээһин бырааһынньыктааҕы фуршетынан түмүктэннэ. Тэрээһин үрдүк таһымҥа ааһарыгар көмөлөспүт бары нэһилиэкпит дьаһалтатыгар, олохтоохторугар, тэрилтэлэригэр, түмсүүлэрбитигэр, биир дойдулаахтарбытыгар, улуус дьаһалтатыгар, культура управлениятыгар махтал тылларын этэбит.
Барыгытыгар дьоллоох олоҕу, үтүмэн үөрүүнү, чөл-чэгиэн буолууну, дьиэ-кэргэҥҥитигэр дьолу-соргуну эрэ баҕарабыт.
